En Atalier Kalon e vez degemeret « arzourien yaouank sot gant arzoù Breizh »

Nevez-staliet emaint en ti e Kemper. E penn-kentañ miz Gouere e oa bet lakaet ur banell « Atelier Kalon » evit heñchañ war-zu o stal, nepell eus kreiz-kêr leun a douristed. Amañ, e rez an douar, e vez ekspozet arzoù Breizh. E-kreiz ar sal ez eus un daol. « Da vamm-gozh ma zad oa bet treuzkaset » , a gont Azenor Le Gal, e-karg eus an degemer, ar c’hehentiñ ha diorren raktres an Atalier Kalon. « Ur seurt « clash » a ra gant ar pezh zo tro-dro » , eme ar plac’h yaouank, 28 vloaz anezhi. War an daol ez eus un doal dantelezh, asiedoù e maen-krag glaz ha tri c’hantoeller du. « Kalzig arzourien yaouank a vez degemeret ganeomp » , a gendalc’h Azenor. Evit poent he deus dibabet ouzhpenn dek anezho evit gwerzhañ t-shirtoù, engraverezh, pladennoù muzik…

Labour Julien Berkel a vez diskouezet da skouer ganti. Listri mod arzoù kentañ a vez savet gant an artizan staliet en Aodoù-an-Arvor. E-kichen e labour Paco Bardary gant an dir, awenet gant stummoù ar Paleolitik. Tatouer a-vicher eo amañ, en estaj. Gant « pladurioù bras a lak war-wel ar c’horf » e labour, eme Azenor Le Gal. Graet he deus anaoudegezh gantañ « d’ar 6 a viz Du 2024 » pa oa bet tatouet gantañ evit ar wech kentañ war hec’h arvrec’h kleiz. « Soñj mat m’eus rak se oa just goude an teulfilm m’oa savet diwar-benn plas ar merc’hed war vag hag an endro. C’hoant m’oa kaout ur vorganez evit ar mor » , a gont ar plac’h yaouank, sot gant ar verdeadurezh hag ar surf.

Lenn ivez : PORTRAIT. Protection des océans, féminisation... Azenor Le Gal veut réinventer la voile

N’he doa ket raktreset Azenor Le Gal dont en-dro da Vreizh. Foetañ a rae bro hag en Antilhez e oa o vevañ. Du-hont he doa merzhet e oa pouezus an identelezh. Hi a sante don enni e oa Bretonez, « hep gouzout perak » . Ar « starter pack » he doa bet koulskoude : breton eo hec’h anv-bihan hag hec’h anv-familh, lakaet e oa bet e Diwan, hag er festoù-noz e oa boaz da vont gant he familh. Deuet en-dro e Breizh e 2024 he deus kejet gant Paco : « Cheñchet eo pep tra em buhez » .

Disheñvel-mik e oa eñ a-fed identelezh vreton. Er Mor-Bihan e oa bet ganet ivez, met en ur familh e-lec’h ma veze komzet galleg nemetken, ha biskoazh ne oa bet da zañsal an andro pe an hanter-dro. Petra eo bezañ Breton ? Petra eo ar stil ? Prederiet en deus war an afer-se goude e studioù war ar skeudenniñ er skol Pivaut, e Naoned. « O klask war-lerc’h ur stil Bro-Frañs oan, met ne oa ket » , eme e galleg ar paotr a 30 vloaz. « A-viskoazh ez eus bet temoù hengounel e pep sevenadur. Komprenet m’eus oan Breton ha pas Gall. » Aet eo da furchal pelloc’h war ar stil-se hag adlakaet en deus anezhañ en e labour.

Evel al loa gizellet e koad a zo a-dreñv, war ar siminal. Roet e veze d’ar c’houbladoù nevez-dimezet hag adkemeret en deus an tem-mañ evit krouiñ. Ur foto a vez diskouezet gant Azenor war he fellgomzer : krommennoù, kroazioù hag ur galon a vez gwelet. Ne vez ket merzhet diouzhtu e teu deus ul loa met ur stil anavezapl a zo. « Tatouet eo bet war ur vaouez ouzhpenn 70 vloaz ! » , eme Paco.

Abaoe miz Even 2026 emañ staliet an atalier Kalon e Kemper, goude bezañ bet e Porzh-Loeiz, er Mor-Bihan.